酒店出門

好耐之前米米已經問我，我地屋企又細又亂，如果要喺屋企出門的話，就可能要裝修喇!! 聽到「要裝修」三個字，當然嚇了一跳。心想：唔使因為咁而要裝修啩，好煩又勞民傷財喎!! 於是同米米講，不如我地喺酒店出門，咁就唔使擔心屋企地方淺窄啦!! 由於佢從未聽過喺酒店出門呢個安排，同埋佢希望已經去了好遠的地方嘅老爸「睇住」我出門，所以對我呢個建議半信半疑。後來，我估佢問過已有仔女結婚的友好問意見，之後對喺酒店出門唔抗拒。不過，佢又好聰明問咗我一條問題：上頭要拜神喎，喺酒店唔可以插香，咁點喺酒店出門呀? 係喎，咁點算呢? 上咗forum睇，又睇埋其他wedding blog，解決方法就係先喺屋企上頭（橫豎師傅話我嘅上頭時間係晚上九點後），然後才去酒店過夜。話完俾米米聽後，佢無異議。

既然御苑會送酒店房俾我地，所以我打算搵佢地睇吓可唔可以幫我訂埋之前一晚嘅酒店房俾我出門用。打俾勞小姐問，佢好直接問我係咪必須要喺擺酒嗰晚住酒店。如果唔使的話，佢提議我地補啲錢upgrade間房作出門用，咁就可以慳番啲錢。呢個真係好提議，無諗過佢會叫我地慳番啲錢 問佢要補幾多錢，佢話近火車站嘅都會海逸房價都OK，建議我地可以喺呢間酒店出門。我地無所謂，其實都會海逸好近Mr. Ha屋企，Mr. Ha仲講笑話可以行路去接新娘 

勞小姐話出門用嘅套房有兩個size，分別係：500呎 & 700呎。我上網睇過，勞小姐提及嘅套房應該係Deluxe Harbourview Suite 和 Grand Harbourview Suite。我計過當日可能有最少20人（新郎、新娘、伴郎、伴娘、家人4名、MUA、Lawrence+assistant、Brian+assistant、姐妹5名、兄弟5名）會喺間套房裏面。根據酒店website的floor plan，我擔心Deluxe Harbourview Suite會比較迫。Mr. Ha亦有同感，所以我地打算租700呎嘅Grand Harbourview Suite。

趁去御苑踩場嗰日，我地搵勞小姐幫我地租套房。今晚收到佢個電話，覆我地租Grand Harbourview Suite要補$1,738，問我地有無問題。Mr. Ha好好呀，完全無say no，咁就confirm勞小姐嘞!! 勞小姐仲話當日check out時先俾差價。遲少少都要問吓佢，會唔會有酒店嘅black & white confirmation