Rundown I – 1st Draft

好早之前已經想寫rundown，但一直都未有「的」起心肝。最近要book車，雖然負責人是同學的朋友，但也要知道rundown才知要book幾多個鐘。另外，化妝姐姐又追問big day當日的rundown。其實早啲有個rundown都係好事，起碼俾有關人等知道自己要做啲咩嘢，同埋可以再俾大家睇吓有無嘢漏咗。

上過ESDLife，搵唔到太多啱自己嘅rundown，好在俾我搵到1個網友嘅rundown跟我個情況相似 一個rundown做參考當然唔夠啦，於是我同Mr. Ha問吓最近結婚嘅朋友（最近都要兩年前!!）攞張rundown參考。集郵咁集咗4、5個rundown，終於開工寫自己嗰個。將啲rundown攤晒喺枱面，一邊寫一邊同Mr. Ha諗要包啲咩嘢落自己嘅rundown裡面，真係覺得好似以前準備考試前溫書一樣。

同Mr. Ha傾咗個draft後，都唔知自己有無漏item，所以搵咗其中兩個姊妹出黎食飯，順便俾comment。有實戰經驗真係唔同啲，佢地較近期結婚，一邊睇rundown一邊問細節，俾咗好多意見，等我知道點樣fine-tune自己個rundown。由於我的姊妹團全都是中學時代的同學，所以大家都互相認識，仲對大家的專長非常了解，所以我地仲諗埋邊個負責邊個item，真好!!!

雖然有咗個初稿，但都要再執，我兩個姊妹仲叫我revise咗rundown後俾佢地睇。其實我仲有要跟Lawrence和Brian傾吓到時影相和拍video嘅安排，問埋才一次過改rundown。我見好多jm好快已經做咗好多嘢，都有啲擔心自己嘅進度。幸好我呢兩個姊妹都拍晒心口，叫我有需要就搵佢地幫手，行街睇嘢幫手打點絕無問題!! 真係多謝晒